Evaristo Ben:“Podemos gañar as eleccións nos sete concellos do Partido Xudicial de Carballo”.
“Podemos gañar as eleccións municipais nos sete concellos do Partido Xudicial de Carballo” afirmou o director de campaña do PP na provincia, Evaristo Ben, no marco dunha cea que celebraron os populares en Laxe, e á que asistiron concelleiros e militantes da formación na zona.
O vicesecretario de organización amosouse optimista de poder gañar nos concellos de Cabana, Carballo, Coristanco, Laxe, Laracha, Malpica e Ponteceso e lembrou que en 2015 o PP quedou a “un puñado de votos” de gobernar en Ponteceso, Coristanco e Laxe.
Unidade, traballo en equipo e xenerosidade
Ben Otero pediu “unidade, traballo en equipo e xenerosidade” aos membros do partido na bisbarra: “Vós sodes a base e os responsables dos éxitos que este partido cultiva en todas as eleccións. Sodes as persoas que dan a cara pola nosa formación, que estades a pé de rúa cos veciños e que coñecedes os seus problemas”.
O dirixente non se esqueceu dos gobernos que ten o Partido Popular en Bergantiños, e puxo como exemplo o traballo dos alcaldes José Manuel López Varela(A Laracha), Eduardo Parga Veiga(Malpica) e José Muíño Domínguez(Cabana) e mostrouse convencido de que “en 14 meses teremos máis exemplos que poñer sobre a mesa” xa que “O Partido Popular sempre foi unha referencia nesta comarca”.No acto tamén estivo presente o secretario xeral do PPdeG, Miguel Tellado.