Evaristo Ben está convencido de que o PP está preparado para facerse coa alcaldía de Muxía.
Os militantes do Partido Popular elixiron por unanimidade a portavoz municipal, Sandra Vilela, coma nova presidenta local do partido despois do congreso celebrado este sábado, e que contou coa presencia do secretario de organización provincial, Evaristo Ben Otero, do deputado autonómico, Aurelio Núñez Centeno, de concelleiros actuais e doutras lexislaturas como é o caso do exalcalde Alberto Blanco.
Na súa intervención, Evaristo Ben mostrouse convencido de que a súa formación está “preparada e en boa disposición” para lograr facerse coa alcaldía do Concello de Muxía nas eleccións de 2019.
Ben Otero louvou o “gran traballo” realizado pola xestora popular durante o último ano. “Non teño ningunha dúbida de que a nova directiva é consciente de que queda moito traballo por facer durante o próximo ano, pero tampouco teño ningunha dúbida de que eles son os que mellor saben todo o que hai que facer e os que máis ganas teñen de levalo a cabo. Así que, parabéns a todos e a traballar duro” declaro o secretario de organización.
Sandra Vilela defende a política de proximidade
Pola súa banda, Sandra Vilela animou aos membros do partido a “seguir dando o callo como o fixemos ata agora” porque, na súa opinión, ese é o “único camiño para poder alcanzar os obxectivos que nos marcamos”.
Para Vilela Riveiro o congreso local “pon as bases” para que o Partido Popular de Muxía volva ser unha referencia para todos os veciños. “Entendemos a política desde a proximidade e desde o contacto con toda a xente e creo que a única maneira de conseguilo é baixando á rúa e visitando todas e cada unha das parroquias como fixemos ata a data” manifestou Vilela.
