Dúas mil racións repartidas e locais cheos na Festa do Bolo do Pote de Mazaricos

Éxito de convocatoria na festa gastronómica organizada polo concello de Mazaricos.

Agardábase un novo éxito e así foi.Na degustación celebrada no campo da feira de A Picota, repartíronse unhas dúas mil racións de bolo do pote. Vinte edicións dunha festa que segue collendo prestixio.

Segundo a organización, que corresponde ao concello de Mazaricos en colaboración coa asociación Monte Picoto e Amas de Casa, “este ano foi o que máis xente houbo de todos os últimos”. Moitas persoas aseguraron que o produto estaba “delicioso”.Unha resposta popular masiva que tamén afectou aos locais hostaleiros como confirmou o presidente da asociación, Jorge Jurjo.

O alcalde, Juan José Blanco Riveiro afirmou sentirse “orgulloso das tarefas de promoción do produto, tanto en Xantar como na homenaxe a Rosalía de Castro”. 

O grupo de gaitas O Verán e a charanga Os Jalácticos animaron a festa, que contou tamén cunha exposición de trinta coches minis.O gañador ao coche máis fermoso e coidado foi o de José Cacheiro que recolleu o premio de mans do alcalde de Mazaricos. A votación levárona a cabo as persoas asistentes.