O alcalde, Juan Blanco, cualifica de “espectacular” a experiencia en FITUR.
“Nós temos un produto que é o concello e pretendemos facer un paquete conxunto con eles, e xa concretamos con varias axencias que virán pasar a Mazaricos uns días para preparar esta oferta”. Estas declaracións do alcalde Juan Blanco de volta da feira internacional do turismo Fitur, resumen o contido da “fam trip” que se celebrou nun restaurante de Madrid o pasado xoves.
Como sinala Blanco Riveiro quixeron ir más alá do “apartado protocolario” e da promoción dentro do recinto de Ifema e xuntaron a uns vinte turoperadores para ofrecerlles unha presentación personalizada.
Unha intervención do alcalde apoiada por recursos multimedia, a proxección dun vídeo de Eu Son Mazaricos, e unha degustación de produtos da terra foron o os ingredientes deste acto, que rematou cos propios contactos entre representantes municipais e os convidados. Non faltou o presidente da asociación de hostaleiros de Mazaricos, Jorge Jurjo.
E segundo comentaba Juan Blanco hai conversas avanzadas e pretendese que os propios axentes turísticos especializados en eco turismo, turismo familiar ou no Camiño de Santiago, visiten Mazaricos para concretar ese produto turístico do concello.
O alcalde lembrou as potencialidades de Mazaricos coas súas paisaxes, gastronomía, patrimonio megalítico, ou os recursos relacionados coa auga como as “fervenzas” de Nubeira ou Santa Leocadia.
