O presidente provincial insiste que o obxectivo do seu partido é nomear aos candidatos con, polo menos, un ano de antelación respecto da celebración das municipais.
Que os veciños perciban ao Partido Popular como “unha clara opción de goberno real, seria e solvente”. Ese é o obxectivo inmediato que se marcan desde a dirección provincial, para poder gobernar nos concellos da bisbarra de Bergantiños.
O presidente provincial Diego Calvo, acompañado polo vicesecretario xeral de Organización e Territorio, Evaristo Ben, mantivo unha xuntanza de traballo cos alcaldes de Cabana, José Muíño, Malpica, Eduardo Parga, e A Laracha, José Manuel López Varela e cos portavoces municipais Aurelio Núñez Centeno(Carballo), José Luis Fondo(Ponteceso), e José Luis Pérez Añón(Laxe).
Gobernar en tódolos concellos de Bergantiños
“Acabamos de arrincar un ano no que están en xogo moitas cousas. Temos por diante o reto de seguir fortalecéndonos en todos e cada un dos concellos, de continuar escoitando aos nosos veciños e, ademais, de dar a coñecer o nome dos que serán a nosos cabeza de lista” asegurou Diego Calvo. Estes nomeamentos deberán ser públicos un ano antes das eleccións.
O PP quere gobernar en tódolos concellos de Bergantiños:“Estamos a falar dun obxectivo ambicioso, pero mentres outros se conforman con apartarnos do goberno da maneira que sexa, sumando cos partidos que sexan, nós aspiramos a conseguir a confianza do maior número de veciños para tomar as rendas dos municipios”, dixo Calvo.