A Xunta non está de acordo coa intención da UE dunha veda total da sardiña

A consellería do Mar propón unha redución das capturas pero discrepa da proposta do ICES.

Canal Barbanza

Non corren bos tempos para a captura da sardiña ibérica. E o futuro parece non ter mellores perspectivas. Os mariñeiros galegos están preocupados.Os científicos do Consello Internacional para a Exploración do Mar(ICES) propoñen unha veda total para o ano 2018. Os técnicos acenderon as alarmas sobre a perda de biomasa desta especie peláxica.

Desde o goberno do estado, a ministra Isabel García Tejerina está disposta a manter a proposta de que se poida pescar sardiña en Galicia aínda que suxire un recorte dun 25% no tope de capturas. A Xunta mantén a mesma postura e asegura que «recurso hai» aínda que «non ten a abundancia que tivo noutros momentos» e recoñecen que existe esta discrepancia coas autoridades europeas.

Veda total ou redución de capturas

En declaracións á Televisión de Galicia, a conselleira do Mar, Rosa Quintana explicou a situación:»Pechamos durante quince anos e se vai a recuperar a sardiña no ano 2024 ou mantemos unha actividade extractiva menor pero coas posibilidades de pesca abertas e conseguimos que  o incremento se produza tres anos mais tarde. eu creo que ben vale a pena esperar eses tres anos». A conselleira asegurou que xunto coas contactos coas autoridades comunitarias tamén se manteñen conversas coas confrarías galegas.

Agora o sector está pendente das decisións da Unión Europea e de que finalmente sexa positiva a interlocución desde a Xunta e o Goberno do estado.Os informes científicos recomendan a prohibición da pesca da sardiña no Atlántico.A frota galega sería especialmente prexudicada xunto coa do Cantábrico, a do Golfo de Cádiz e Portugal.

Cotizacións nas lonxas

No que vai de ano vendéronse nas lonxas galegas 3,4 millóns de quilos de sardiña a un prezo medio de 1,73 euros (5.972.076 euros en total). No ano anterior(2016) houbo maior volume de pesca(4,3 millóns de quilos) pero a un prezo inferior que alcanzou o 1,51 euros por quilo(En total 6.585.448 euros).No ano 2015 a cotización media foi de 2,11 euros e vendéronse 3,3 millóns de quilos(6.960.751 euros).