Coristanco, unha política de regueifa

O alcalde segue de baixa e xurde unha regueifa mentres a xustiza admite a trámite a denuncia de Terra Galega contra o pleno da moción de censura.@cristobalmourin

A presente lexislatura no concello de Coristanco da para un libro. Desde un goberno tripartito de 7 membros e tres partidos que se quedou en 4 membros dun só partido na dirección ata un alcalde, Abraham Gerpe, que chegou á alcaldía froito dunha controvertida moción de censura, e que despois de tomar posesión e estar uns días no sillón da alcaldía tivo que deixar temporalmente o posto ao exalcalde Antonio Pensado Plágaro.

Un accidente de circulación no Val do Dubra provocou que Gerpe Muñiz non poidera participar no primeiro pleno despois da moción. Mentres superaba desta adversidade fai uns días sufría outro accidente, o cal parece que prolongará o seu proceso de recuperación.

Unha negativa circunstancia que deu para múltiples comentarios. Moitas pensarán que todo este argumento, real como a vida mesma daría para unha película. O que era de agardar e que nun territorio de regueifeiros este asunto tiña que acabar nunha copla publicada na páxina de Facebook “Regueifando pola vida” de Guadalupe Blanco Vázquez.

Mire usté señor alcalde

ándeme máis con xeitiño

que vamos ter que ofrecelo 

á nosa virxe do Corpiño.

Non sale dunha e volve

eso non é alegría

andar tendo accidentes

así cada quince días.

É un tema complicado

a desgracia non aparta

algún dí ás agochadas 

que esto pasa polo Karma.

Voulle dar unha receta 

coma se fora meu fillo 

agora de aquí en diante

leve allos no bolsillo.

Leve allos no bolsillo

que mal o están a mirar 

vai ir pola carretera 

e volverse «amaghuar».

Teña ollo polo pueblo 

e vigile as aceras

que topei pola mañán 

varias arquetas abertas.

Non acaba de sentarse 

nese dichoso sillón 

e esnafra o coche novo 

nunha javia ou valeón.

Xa comentan os veciños 

que o puesto vai de cú 

ten xente que o rodea 

que lle anda facendo vudú.

Pero tea tranquiliño 

non vaia se-lo demonio

usté faga repouso 

que sigue mandando Antonio.

E seguindo coa actualidade política do concello coristanqués o xulgado do Contencioso administrativo número 4 da Coruña admitiu a trámite a denuncia presentada por Terra Galega contra o pleno da moción de censura que se celebrou o pasado 25 de agosto. A xustiza pide os expedientes administrativos para seguir investigando este polémico asunto.

Terra Galega Coristanco considera esta admisión “un primeiro paso” e agarda que “a lóxica impere neste proceso”.