Compromiso e o PSOE refírense a un artigo de El Correo Gallego no que un veciño denuncia impedimentos por parte do concello para o uso do pavillón e a piscina.
O secretario local de Compromiso por Galicia, David Barbeira, empraza ao goberno local a dar explicacións pola polémica xurdida a raíz da denuncia presentada no cuartel da Garda Civil de Santa Comba por parte dun veciño de Santa Comba que se dedica aos servizos deportivos, e que foi difundida polo xornal El Correo Gallego.
“Necesitamos que desde o concello digan algo e que presenten as probas que teñan que presentar para desmentir iso ou se é verdade que se tomen responsabilidades” afirmou Barbeira que polo momento quere agardar “con cautela” as aclaracións do bipartito xalleiro.Na denuncia, Cleiton Santos, apuntaba á concelleira de deportes e a técnica deste mesmo departamento.
Reflexións do Partido Socialista
Pola súa banda, Desde o Partido Socialista tamén compartían a noticia de El Correo Gallego nas redes sociais e opinan que “esta é, ao final, a imaxe que se está a dar do noso Concello. Un concello atrasado e caciquil gobernado polo PP de forma despótica e absolutista. Unicamente saímos na prensa por asuntos coma estes ou por publicidade de autobombo, pagada con fondos públicos”.Os socialistas afirman que o trato que reciben os veciños “depende da cor política” e que os populares “só gobernan para os seus”.
