Anuncia un investimento de 45.000 euros no CEIP San Vicenzo e entrega chaves de catro vivendas de alugueiro social en Cee.
O delegado territorial da Xunta de Galicia,Ovidio Rodeiro, visitou dous concellos da Costa da Morte. No concello de Vimianzo o delegado achegouse ao IES Terra de Soneira, no que a Consellería de Educación investiu máis de 11.000 euros na reposición dun ascensor para facilitar a accesibilidade.
Rodeiro anunciou a construción dun patio cuberto no CEIP San Vicenzo, cun orzamento de algo máis de 45.000 euros.”A Consellería está a traballar arreo para obter canto antes as autorizacións para comezar a obra” indicou o delegado que lembrou que neste centro xa se investiron recentemente máis de 12.000 euros en diversas reparacións, entre elas na cociña.O alcalde de Vimianzo, Manuel Antelo Pazos, e a portavoz do Partido Popular, Raquel Rodríguez Amigo, tamén estiveron presentes nesta visita.
Vivendas sociais en Cee
A estadía de Rodeiro na bisbarra completouse en Cee, onde entregou as chaves das catro vivendas que a Xunta de Galicia, a través do Instituto Galego da Vivenda e Solo (IGVS), pon a disposición de familias en situación de vulnerabilidade social. Trátase de catro pisos situados no termo municipal de Cee, e que son cedidos en réxime de alugueiro social.