O período medio de pago situouse en 4,55 días// O portal de emprego aumenta en usuarios e ofertas.
.jpg)
O departamento de Intervención do Concello da Laracha vén de emitir o informe relativo ao período medio de pagamento ao provedores do terceiro trimestre, que unha vez máis reflicte a boa situación económico-financeira.
O documento indica que, unha vez aprobada a factura, estanse a realizar os abonos nunha media de 4,55 días, reducíndose a cifra en practicamente seis días con respecto ao trimestre anterior. Por tanto, volve poñerse de manifesto con estes datos oficiais a celeridade á hora de tramitar e pagar as facturas, mesmo adiantándose aos prazos establecidos na Lei de Estabilidade Orzamentaria e Sostenibilidade Financeira (máximo de 30 días).
Magnitudes de especial relevancia e que indican o volume de actividade desenvolvida no termo municipal no trimestre que vén de rematar é que en xullo, agosto e setembro o Concello da Laracha realizou 719 operacións de pagamento a provedores por un importe total de 1.307.838,09 euros.
O documento relativo ao período medio de pagamento xa está dispoñible na sección de “servizos económicos” da web municipal (www.alaracha.gal) e darase conta do mesmo á Corporación municipal no próximo Pleno.
O portal de emprego aumenta os usuarios e as ofertas
O portal municipal específico de emprego que o Concello da Laracha ten operativo no dominio www.alaracha.es/emprego está a presentar un progresivo aumento tanto no número de persoas e empresas usuarias como na cantidade de ofertas de traballo.
A día de hoxe a cifra de usuarios da plataforma aproxímase aos douscentos ao estar rexistrados 163 perfiles de cidadáns demandantes de emprego e tamén os de 28 empresas ás que se lle ofrece a posibilidade de utilizar esta ferramenta para facilitarlles a incorporación de traballadores. Nestes momentos o número de ofertas de emprego vixentes ascende a 24.
Este portal, dirixido a persoas empadroadas no municipio e a calquera empresa ou particular que oferten emprego, comezou a funcionar neste ano creando un novidoso servizo municipal de colaboración entre o propio Concello da Laracha –a través da Axencia de Emprego e Desenvolvemento Local, que xestiona a bolsa de emprego-, os demandantes e os ofertantes de postos de traballo.
As persoas usuarias do portal poden consultar as ofertas de emprego, as novas máis relevantes nesta materia, solicitar calquera dos servizos que ofrece a Axencia de Emprego e Desenvolvemento Local municipal e xestionar o seu currículum vitae e envialo directamente desde a propia plataforma.
No caso das empresas rexistradas, poderán publicar as súas ofertas de emprego de xeito gratuíto e acceder aos perfís das persoas que se inscriban, simplificándolles a posterior realización dun estudo pormenorizado das candidaturas. Ademais, as empresas con sede no termo municipal teñen á súa disposición un apartado específico para dar publicidade aos seus servizos e actividades.
O portal municipal de emprego é unha iniciativa pioneira na Costa da Morte que o Concello da Laracha ten en marcha cos obxectivos concretos de facilitar aos cidadáns laracheses a súa incorporación ao mercado laboral e favorecer a creación de emprego por parte das empresa radicadas no termo municipal.
