Asegura que os “experimentos” dos concellos de Cee e Fisterra supuxeron un retroceso nos respectivos territorios.
O vicesecretario xeral de Organización e Territorio do Partido Popular provincial, Evaristo Ben, mantivo unha xuntanza en Vimianzo con representantes do partido nos concellos de Camariñas, Carnota, Cee, Corcubión, Dumbría, Fisterra, Muxía, Vimianzo e Zas.
Ben Otero está convencido de que o PP “recuperará o peso político perdido na Costa da Morte”, onde non ten ningunha alcaldía e incluso perdeu un representante da Deputación provincial.
Lembrou que o PP xa sabe o que é gobernar, citando os casos dos concellos de Fisterra e Cee nos que “os experimentos actuais dos seus executivos locais só conseguiron que os seus municipios retrocedan e que os seus veciños teñan menos posibilidades de prosperar”.Evaristo Ben dixo que aspiraba a recuperar estes concellos pero tamén a gañar nos outros da comarca.
Mensaxe mobilizadora de Evaristo Ben
“Temos por diante un curso político no que o traballo que fagamos será clave para o resultado que logremos na próxima cita coas urnas” afirmou Ben que insistiu na necesidade de que nos distintos municipios comencen a presentarse equipos de proxectos que xeren ilusión e sexan aglutinadores.
“Quédannos menos de dous anos para seguir escoitando aos veciños e para estar a pé de rúa. O reto que temos por diante é duro, pero seremos capaces de alcanzalo se traballamos xuntos e mirando nunha mesma dirección” manifestou Evaristo Ben.
