Santa Comba, Mazaricos, Dumbría, A Laracha, Arteixo e Carballo participan en obradoiros financiados pola Xunta.
A Consellería de Economía, Emprego e Industria destina máis de 700.000 euros para financiar distintos obradoiros de emprego en Santa Comba, Mazaricos, Dumbría, A Laracha, Arteixo e Carballo.
O delegado territorial da Xunta na Coruña, Ovidio Rodeiro, destacou o “compromiso claro da Xunta para traballar na creación de postos de traballo de calidade, estables e coa mirada posta no futuro”.
Sinalou que “grazas a estes obradoiros centos de persoas obterán un posto de traballo, uns formándose e outros formando”, informando que a Xunta incrementara nun 10% o orzamento con respecto ao ano pasado.
Obradoiro en Dumbría, Mazaricos e Santa Comba
Na comarca de Bergantiños comezarán ao longo deste mesmo mes dous obradoiros de carácter xeral. O Concello da Laracha impartirá, a partir da vindeira semana e xunto con Arteixo, as especialidades de actividades auxiliares en conservación e mellora de montes, e traballos de carpintería e moble.
Pola súa banda, Dumbría organiza, con Mazaricos e Santa Comba, un ciclo de instalación e mantemento de xardíns e zonas verdes, e promoción turística local e información ao visitante. O comezo está previsto para o vindeiro día 29. Estes dous obradoiros están dotados cun investimento de 280.000 euros cada un e acollerán a 40 alumnos-traballadores. Os obradoiros amplían a súa duración e pasan de seis a nove meses.
En Carballo terá lugar un obradoiro das especialidades de revalorización de espazos urbanos, e traballos de carpintería e moble, dentro do Sistema de Garantía Xuvenil, no que participarán 12 alumnos-traballadores e que contará cun orzamento de 140.000 euros.
Fotos arquivo-Ovidio Rodeiro en visitas a Laracha e Santa Comba
