A regueifeira Lupe Blanco será a encargada da lectura do pregón. Organiza o concello de Coristanco. Sábado e domingo 16 e 17 de setembro.
Lupe Blanco, pregoeira
@cristobalmourin
Como cada mes de setembro hai unha fin de semana ben marcada no calendario festeiro da bisbarra de Bergantiños e de toda a provincia, a Festa da Pataca. Este ano coincidiu cun cambio de goberno pero isto non impediu que a exaltación deste produto típico ofreza un cartel ateigado de actividades.
Unhas actividades que comenzarán o sábado 16 de setembro cunha concentración de coches clásicos, desde as 12 do mediodía na praza do concello. Desde as 17.00h haberá xogos infantís no mesmo lugar e dúas horas máis tarde no salón de actos do Edificio de Cultura presentarase “Lembranzas”, o álbum fotográfico da parroquia de Traba. Esta primeira xornada rematará coa actuación dunha orquestra no parque municipal.
Concursos, desfiles, degustación e música
Pero sen dúbida o día grande é o domingo 17 de setembro. A partir das 9,30 terá lugar a concentración de tractores engalanados na praza do concello e comenzarán os concursos gastronómicos, de produtos do campo, figuras con patacas e de empanadas. Posteriormente haberá un pasarrúas amenizado por unha charanga e unha banda de gaitas e as 11,30 os tractores engalanados desfilarán por Coristanco.
As 12,30 celebrarase unha misa cantada pola Coral Polifónica Santa Cecilia de Coristanco e sobre as 13,00 a regueifeira Lupe Blanco procederá á lectura do pregón. Despois entregaranse os premios do concurso e as 14,00h abriranse os stands para a degustación de pataca na rúa do Muíño.
Desde as 16,00h haberá xogos infantís e xuvenís na mesma rúa e ás 17,00h será a quenda dos concursos do Baile da Pataca, Apaña Pataca, Trueiro da Pataca e Tiro da Corda.
A XXXVII Festa da Pataca rematará cun concerto de corais polifónicas e coa actuación dun grupo musical no parque municipal.
