O concello de Fisterra aprobou os seus orzamentos para o presente exercicio sen ningún voto en contra.
PSOE e BNG votaron a favor e a oposición, PP e CG, optaron por absterse asegurando que o documento económico era “unha fotocopia” doutros anteriores. As contas ascenden a 3.487.797 euros como xa adiantamos nunha crónica anterior.
Un orzamento que crece
“Este orzamento crece un pouco con respecto ao ano pasado” sinalou o alcalde José Marcote, precisando que “os gastos están adecuados aos ingresos”.
Expresou o seu interese en que as contas se aprobaran antes pero xustificou o atraso deste ano nas dúbidas que había coas axudas da Deputación e tamén no proceso de elaboración da RPT que estará próximamente rematada.
José Manuel Traba a Kuka Sar: “Medre o mar, aprende a sumar»
O voceiro do Partido Popular, José Manuel Traba, recriminou que as contas chegaban tarde “algo que se nos reprochou a nós durante moitísimos anos”, asegurou que eran “unha fotocopia de anos anteriores”, e dubidou que un dos investimentos por importe de 110.000 euros se poida chegar a executar.
E referiuse a débeda incluída no Plan de Aforro da Deputación cunha mensaxe directa ao tenente de alcalde nacionalista, Kuka Sar:“A débeda existe e son 320.000 euros. Non hai que ser trilero. Medre o mar, aprende a sumar».
A resposta de Sar foi:”Encántame que me sigas no Facebook e iso que non tes”. Pola súa parte para o rexedor José Marcote “a débeda é bastante asumible,non me preocupa absolutamente nada.” PP e Converxencia Galega coincidiron en que non era grande.
Posteriormente e a través das redes sociais o voceiro do BNG escribiu:»Datos oficiais, non de trilero. Fisterra, 171.000 euros de débeda. Datos do Ministerio de Hacienda».
Xan García:”Isto é un copia e pega”
O voceiro de Converxencia Galega, Xan García Pouso, lamentou que as contas se aprobaran “tarde, mal e arrastro” e convidou ao goberno a empezar a preparar o seguinte presuposto.
“Isto é un copia e pega, está executado un oitenta por cento, aquí non hai nada que discutir” declarou García, e a pesar das críticas dixo que se abstiña porque “non participei na elaboracion do orzamento pero tampouco quero poñer paus na roda”.
.jpg)
