Os sete asinantes da moción afirman que a situación en Coristanco era insostible

Sete concelleiros asinaron unha moción de censura no concello de Coristanco.

Postúlase para alcalde o edil socialista Abraham Gerpe que presentou o texto no rexistro municipal e que conta co respaldo dos seis concelleiros do Partido Popular, Antonio Pensado, Juan García Velo, María Ángeles Eiroa, Clarisa Couto, Emilio Fondo e Luis Souto. 

Os sete promotores da moción aseguran que a situación de enfrontamento entre goberno e oposición “tense convertido en algo insostible” e culpan ao alcalde, Amancio Lavandeira, de responder “con desprezo e soberbia” ás iniciativas dos demais grupos entre elas a proposta de baixada de impostos ou a petición de que se confeccionasen os orzamentos.

Un goberno ancorado na soberbia e no autoritarismo

No seu escrito acusan ao grupo de goberno de Terra Galega de estar “ancorado na soberbia e parapetado nun autoritarismo desquiciado” e de ser incapaz de chegar a acordos:”Os acordos que non foi capaz de conseguir o Sr. Amancio, si os temos logrado os grupos da oposición”.

“O alcalde tratou de menoscabar a liberdade de expresión dos grupos da oposición, tratando así de ocultar os gravísimos erros de xestión do goberno de TEGA ante a ciudadanía” sinalan.

Indican que “hoxe constituímos unha ampla maioría dentro da corporación“ fronte a acción dun goberno en minoría que “non está a executar os proxectos en infraestruturas, e con moitas posibilidades que se perdan ditos proxectos”.

Tamén critican que “En lugar de priorizar atender ás necesidades máis urxentes, o equipo de goberno dedícase a gastar os cartos de todos os cidadáns en actuacións de nulo impacto para o pobo e dubidoso beneficio”.O pleno da moción de censura está previsto que se celebre o vindeiro mércores 23 de agosto. 

Se prospera a moción o alcalde será Abraham Gerpe, que apoiou co seu voto na investidura ao alcalde Amancio Lavandeira, formou parte do goberno xunto con Tega e BNG, e agora promove unha moción de censura co Partido Popular. Os promotores desta iniciativa comprométense a traballar “con transparencia real e con eficacia”.