Declaracións do alcalde de Coristanco sobre a moción de censura presentada por PP e PSOE.
O alcalde de Coristanco Amancio Lavandeira non entende a moción de censura presentada polos concelleiros do Partido Popular e do PSOE xa que pensa que é “un pacto antinatura moi sorprendente que deberán explicar”, máis despois do novo liderado que representa Pedro Sánchez no Partido Socialista. O rexedor afirmou que o voceiro socialista Abraham Gerpe lle comunicara que tiña o apoio do seu partido.
“Agora herdan débeda cero”
Lavandeira non se sinte moi sorprendido “porque rumores sempre houbo e estaban no intento” pero non encontra razóns que sustenten a iniciativa, e menos despois de presentar os datos da xestión económica:”A xestión está aí. Agora que están as contas saneadas e fixemos o traballo, veñen como salvadores”.
O líder de Terra Galega asegura que “era moi importante reducir o gasto e agora herdan débeda cero”. Sobre as declaracións do Partido Popular provincial que aseguran que descoñecían a presentación da moción, Amancio Lavandeira é claro:”Se o fixeron a espaldas do partido logo terán que expulsalos”, aínda que precisou que a postura do PP lle parece máis ben “unha escusa”.
Partido Popular provincial
Desde a dirección provincial do Partido Popular aseguran que descoñecen “os termos da moción de censura” e están á espera de coñecer os detalles da mesma para poder pronunciarse ao respecto e trasladar se autorizan ou non a medida adoptada polos seus seis concelleiros.