Este luns celébrase un pleno onde se debaterá unha moción do bipartito PSOE-BNG e outra do Partido Popular.
O PP pide que se paralice a peonalización
Un dos temas candentes na sociedade de Fisterra chega ao salón de plenos. A peonalización da rúa Real e da praza da Constitución será obxecto de debate no pleno ordinario que se celebra este luns 7 de agosto no concello.
O portavoz do Partido Popular e exalcalde, José Manuel Traba, defenderá unha moción na que se pide que se deteñan as medidas impulsadas polo executivo local e se paralice o corte de acceso rodado as citadas rúas, mentres non se elabora un plan de mobilidade e se acade o consenso con veciños e comerciantes
Os populares queren que este plan de mobilidade acolla un estudo socioeconómico que apoie a medida, cun regulamento de horarios, delimitación da superficie, mellora da sinaléctica e onde se recollan as “especificidades de Fisterra”.
Desde o PP lembran que existe unha desaprobación “moi maioritaria” ao plan promovido polo executivo local.A moción será rexeitada con toda probabilidade polo grupo de goberno, que leva tempo defendendo a actuación realizada. Podería obter o apoio do edil de Converxencia Galega, Xan García Pouso, aínda que é insuficiente para que se aprobe.
O goberno de Fisterra rexeita os recortes da Xunta
O goberno do PSOE e BNG presentaron unha moción para que a corporación exprese o seu rexeitamento ao “escandaloso e inxustificado recorte” das axudas do plan de camiños rurais da Xunta de Galicia, que no caso de Fisterra en 2014 foron de 25.685 euros, no 2016 ascenderon a 42.806 euros e neste ano baixaron ata os 18.568 euros.
As formacións que lideran o alcalde José Marcote(PSOE) e o tenente de alcalde Xan Carlos Sar(BNG)piden que se recupere como mínimo o importe das axudas do ano 2016. Tamén propoñen que se reduzan as subvencións nominativas e se aumenten as “subvencións directas con importes prefixados”.
No texto da moción destacan tamén a baixada das partidas para a fixación da poboación no medio rural, algo que critican e definen como un “maltrato ao rural” por parte do goberno de Alberto Núñez Feijóo.
