Se este goberno logrou liquidar unha débeda de máis de 3 millóns en dous anos, por qué antes a débeda de Coristanco en vez de sanearse medraba constantemente? pregúntanse desde o executivo local.
Falan de recuperación económica
O goberno local de Terra Galega en Coristanco fixo públicos os datos sobre o peche do exercicio 2016, cun saldo de 4,3 millóns de euros o que considera “unha noticia moi positiva” xa que “con estes cartos pagaranse as facturas pendentes e liquidarase, no prazo máis breve posible, a débeda pendente cos provedores, que alcanza os 2.763.822,48 €”.
Desde o executivo que preside Amancio Lavandeira destacan que en só dous anos “logrouse liquidar a débeda acumulada polo goberno anterior que superaba os tres millóns de euros” e tamén reducir o período medio de pago a provedores.
Sinalan que “esta débeda afogaba as contas do concello” paralizando moitas iniciativas pero a partir de agora “as axudas económicas doutras administracións ao Concello poderán investirse en obras en vez de utilizalas para pagar a débeda”.Nun comunicado de prensa aseguran que esta “recuperación económica” é o resultado “dun gran esforzo de aforro e redución de gastos”.
.jpg)
Preguntas ao anterior goberno do PP
-Se este goberno logrou liquidar unha débeda de máis de 3 millóns en dous anos, por qué antes a débeda de Coristanco en vez de sanearse medraba constantemente?- pregúntanse desde o goberno local, e aínda que non fan mención directa, a pregunta vai dirixida ao anterior executivo liderado por Antonio Pensado Plágaro.
– Onde se investiron eses cartos? Onde están?, tamén se preguntan desde o goberno de Terra Galega.
“Pola nosa parte, seguiremos traballando e centrando os nosos esforzos en que o noso Concello siga progresando e deixe de estar á cola dos demais concellos da comarca” engaden.
