Pleno extraordinario este luns no concello de Camariñas.
O concello de Camariñas celebrará un novo pleno extraordinario este próximo luns 3 de xullo. Pero non será o pleno solicitado polo grupo municipal do Partido Popular.
Nesta sesión, convocada para as 14,30h tratarase sobre a “declaración de incompatibilidade sobrevida de Manuel Valeriano Alonso de León suxeita a suspensión de ser interposto interesado recurso para a protección dos dereitos fundamentais”.
Ao parecer a solicitude de pleno extraordinario do PP, avalado polas sinaturas, foi denegado pola alcaldía. Algo moi criticado polos populares:”Ademais de non dar explicacións nos últimos plenos as preguntas, agora xa non deixa nin que se poidan chegar a acordos necesarios, e impídese o cumprimento da Lei. Recoñece a súa incompatibilidade (advertida polo PP de Camariñas desde o principio) pero quere prolongar a situación sen pensar nos problemas que lle acarreará os seus veciños, e comprometer o Pleno nun acordo que pode ser constitutivos de ilícito penal”.
O grupo que lidera Mauro Aufiero, pediu un pleno para que, seguindo as indicacións dos informes de secretaría e intervención, se efectuara a toma de coñecemento da situación de incompatibilidade do rexedor e que se tramitara a credencial do novo concelleiro que debería de substituir a Alonso de León.
Pero o punto incluído na orde do día non recolle as propostas dos populares que se queixan do proceder do alcalde:”Lembramoslle o señor Valeriano que o pleno non ten competencias para interpretar a Lei, e nunca faremos nada contrario a mesma como é o que está pedindo nesta ocasión, nin coartaremos a liberdade de expresión dos veciños como vostede fai o denegar a solicitude do noso pleno” indican nunha nota de prensa.
