Ricardo García Mira pide no Congreso que se respecte a legalidade// O Comité presenta alegacións á solicitude de Ferroatlántica e a empresa segue movendo as súas fichas.
A corporación de Arteixo votou a favor do Plan Industrial de Ferroatlántica que levaría consigo a segregación das centrais hidroeléctricas da Costa da Morte. Algo que conta cun potente rexeitamento na Costa da Morte.
O alcalde de Arteixo, Carlos Calvelo(PP) e os voceiros Martín Seco(PSOE) e Charo Figueiras(Tega) defenderon a moción de apoio á proposta presentada polo Grupo Villar Mir. A voceira nacionalista Silvia Seixas(BNG) optou pola abstención e deixou claro que está en contra da segregación.
Fai uns días, o deputado socialista Ricardo García Mira, solicitou na comisión de Enerxía do Congreso dos deputados que que cumpra coa legalidade vixente que impide a segregación das fábricas e das centrais.
Mentres se agarda coñecer o informe da Xunta de Galicia, Ferroatlántica segue movendo as súas fichas e propuxo que se constitúa unha comisión mixta de seguimento para que se “vigile el cumplimiento de los compromisos industriales y de creación de empleo”, o que segundo a empresa reforzaría as esixencias e sancións da Xunta ante posibles incumprimentos por parte da empresa.
Pero os traballadores das factorías de Cee e Dumbría e das centrais hidroeléctricas da Costa da Morte tampouco están quedos. Tamén nas últimas datas presentaban alegacións ao trámite aberto pola Xunta de Galicia con respecto a petición de Ferroatlántica para poder segregar as actividades.
O documento foi supervisado polo profesor da Universidade de Santiago Carlos Aymerich, que sinalou que Ferroatlántica solicita a supresión da cláusula de non segregación, e coas sentenzas xudiciais que existen, a Xunta non tería ningunha obriga legal de acceder a petición.
Á espera do informe da Xunta, o comité de empresa prepara unha manifestación para o vindeiro 8 de xullo, as 12,00, en Santiago de Compostela. Tres días antes haberá unha marcha a pe desde Cee ata a Capital de Galicia.
