As mámoas descubríronse preto da Picota. O concello promove un estudo do Castro de Monte Aro.
A arqueóloga do Concello de Mazaricos, Nina Alvela, vén de facer un descubrimento excepcional: dúas novas mámoas na zona do Panasco, preto da Picota. Unha vez enviadas a Patrimonio, onde xa quedaron catalogadas, a profesional explicou a un grupo de alumnado do C.E.I.P A Picota todo o relacionado co achado no propio lugar.
Unha das mámoas conserva intacto o con de profanación, é dicir, o sitio por onde se expoliaron os tesouros deste tipo de xacementos. Alvela explicou ao estudantado que estes monumentos funerarios están datados entre o 5.000 e o 3.000 a.C. Pertencen, polo tanto, ao Megalitismo, que se inicia a finais do Neolítico.
Alvela afirmou que “Mazaricos, debido á súa xeografía, por ser un altiplano, é un lugar onde abundan as necrópoles tumulares”. Exemplificou isto nas de Val, Porto do Coído ou Busto. Do mesmo xeito, Alvela referiuse á necrópole de Porto Coído como “un xacemento que é estudado a nivel europeo e do que podemos contemplar perfectamente o dolme da Parxubeira”.
Tras a exposición didáctica sobre Megalitismo, a arqueóloga tamén lles falou aos rapaces e rapazas das minas de wolfram do concello que, durante a II Guerra Mundial, serviron de abastecemento aos nazis e favoreceron o estraperlo deste material.
ESTUDO DO CASTRO DO MONTE ARO
Por outra banda, o concello está a levar a cabo unha limpeza controlada do castro ubicado no Monte Aro. A propia Alvela é a que está a supervisar estas tarefas. “Non podemos usar cadeas e debe ser todo moi coidadoso, para non degradar a estrutura do castro”, explica.
“O castro ten dúas murallas perfectamente identificables, e unha terceira, onde estaban as terrazas de cultivo”, sinala. A arqueóloga data o castro “entre 0 600 a.C e o 300 d.C porque, tras iso, este tipo de construccións situáronse a máis baixa altura”.
“Este lugar era un oppidum, é dicir, unha poboación importante, como unha cabeceira de comarca”, constata Alvela. A situación do castro fai que sexa o mellor ubicado da bisbarra do Xallas e un dos máis grandes da Costa da Morte. A Aparecen dúas novas mámoas en Mazaricos profesional afirma que está “segura” de que aparecerán mostras e fragmentos cerámicos durante o estudo.
O alcalde, Juan José Blanco Riveiro sostivo que “pretendemos poñer en valor o noso patrimonio e mellorar as condicións socioeconómicas da zona grazas a un turismo respectuoso e sostible”. A fío disto engadiu que “tamén o facemos porque temos un concello rico en patrimonio cultural e histórico e é imprescindible coidalo e conservalo”.
