Manuel Muíño aclara que é un almacén provisional de restos da construción que serán retirados.
O alcalde de Zas, Manuel Muíño Espasandín, nega que como denunciou o voceiro do Partido Popular, David Gómez Brandariz, haxa un vertedoiro municipal incontrolado detrás do pavillón polideportivo de Zas. Asegura que é un almacén provisional e temporal de restos da construción que serán retirados por un xestor autorizado para o seu tratamento e reciclaxe.
Declaracións no Diario de Bergantiños
En declaracións ao xornal “Diario de Bergantiños”, Manuel Muíño, acusou ao voceiro popular de tentar “desviar a atención e entorpecer a labor do goberno para que non se faga nada no concello de Zas” mediante informacións alarmistas.
Sobre a uralita depositada neste “almacén temporal”, o alcalde asegura que “non procede de ningunha obra do concello, ou ben o depositou algún veciño ou ben a recolleu persoal do concello dalgún punto de vertido”. Lembrou que sobre o amianto das uralitas “so se desprende cando manipulas e rompes unha plancha.Desde o concello de Zas informan que se optou por esta localización para limitar o impacto visual e paisaxístico.
Pulso entre goberno e oposición en Zas
O pulso entre goberno e oposición incrementouse no concello de Zas, xa no último pleno, coas críticas do PP sobre a actuación do BNG no referente á Carballeira de Baio, e coa petición de información sobre contratos municipais.
Esta semana, o alcalde Manuel Muíño, anunciaba a adquisición da Carballeira de Baio por un importe de 43.000 euros.
