Manuel Muíño anuncia o acordo coa propietaria e que o vindeiro 25 de xuño haberá festa, organizada polo concello. Duras críticas para o voceiro do Partido Popular .
O alcalde de Zas, Manuel Muíño, anunciou nunha rolda de prensa que o concello chegara a un acordo coa propietaria da Carballeira de Baio, que permitirá incorporar “ao patrimonio público un lugar único e emblemático” como é esta área composta por 390 carballos.
O prezo finalmente pactado é de 43.000 euros (entre os 30.000 euros que ofrecía o concello e os 56.000 euros que pedía a propietaria). O alcalde informou que a próxima edición da Festa da Carballeira de Baio será organizada polo concello, que proximamente promoverá un plan ambiental nesa contorna e tamén xestionará a súa protección.
Cualificou de “fito importantísimo” e de “boa noticia para Baio” pero tamén para o concello e para a Costa da Morte, o acordo para comprar a Carballeira.
“Nunca estivo na miña cabeza a expropiación”
Muíño Espasandín, que compareceu acompañado polos concelleiros Óscar Lema Romero e Manuel García Velo considerou lóxica a dinámica das últimas semanas onde a propietaria buscaba “conseguir o prezo máis alto posible” e eles o máis baixo, pero explicou que “nunca estivo na miña cabeza a expropiación”.
Tamén recoñeceu que a problemática causou certo “stress” no equipo de goberno, pero finalmente encontrouse unha saída. A situación da Carballeira centrou o último debate plenario.Afirmou sentirse “orgulloso de que haber chegado a este acordo” e considera a Carballeira como “un recurso turístico e económico para Baio”. O vindeiro 25 de xuño haberá a tradicional festa, nesta ocasión organizada polo concello mantendo o formato tradicional.
Críticas para o PP de Zas
Na súa intervención, Muíño tamén tivo duras críticas para o portavoz do PP de Zas, David Gómez, ao que culpa de provocar “que esta negociación fora máis longa e máis díficil” polo seu intento de facer “dano político” mediante unha estratexia coa que pretendía “entorpecer” o proceso, “axudado por significativos persoeiros de Baio”, se ben a “grande maioría non se deixou levar por esta utilización”.
Non disimulou a súa “decepción” co voceiro do PP:”Non hai outro caso no que un concelleiro da oposición diga que o prezo que estás pagando é moi barato”.