Nico Martínez queixase dos contratos menores do goberno local e lamenta que o goberno “se poña nervioso cada vez que se lle pregunta por algún asunto”.
.jpg)
O portavoz do Partido Popular de Mazaricos acusa ao alcalde de “saltarse a lei” de maneira reiterada na adxudicación de contratos menores de servizos externos. Os populares poñen coma exemplo “o novo servizo mantemento de redes sociais, superando, en case o dobre do permitido –máis de 33.000 euros-, o montante destas actuacións”.
“Non se pode presumir de transparencia na xestión municipal e despois utilizar este mecanismo para adxudicar as contratacións sen publicidade e sen dar información aos veciños” declarou Nico Martínez Almallo aseverando que non se trataba dun feito puntual.Martínez indicou que “non hai nada que debater” e empraza ao rexedor Juan Blanco a cumprir “estritamente” coa lei de contratos menores.
Nun comunicado de prensa, desde o Partido Popular de Mazaricos tamén recriminan ao alcalde que faga “oídos xordos” a unha demanda veciñal de obras no camiño de Gosolfre:“Resulta que di que non hai diñeiro e despois decide arranxar un camiño paralelo ao que lle solicitaron os veciños”.
Nico Martínez quixo lembrar que no último pleno o PP volveu a interesarse pola situación do Plan Xeral “despois de que o rexedor asegurase o pasado 15 de setembro que “estaba a piques de saír”.
Por último, o portavoz dos populares en Mazaricos lamentou que «o señor Blanco se poña nervioso cada vez que se lle pregunta por algún asunto. Non debe gustarlle que fagamos oposición”.
