“As centrais non se venden” reivindican desde a Costa da Morte. Este sábado, o mesmo día que o presidente da Xunta prometía o seu cargo na capital de Galicia, a praza do concello de Cee ateigouse de persoas que quixeron expresar o seu apoio ás demandas canalizadas a través do Comité de empresa de Ferroatlántica, que se opoñen á segregación das actividades nas fábricas de Cee e Dumbría e piden a intervención de Alberto Núñez Feijóo.
A escritora Rocío Leira e o actor Toño Casais foron os encargados de ler o manifesto. Os traballadores estiveron arroupados por centos de veciños pero tamén polos alcaldes da Costa da Morte, e por representantes dos distintos partidos políticos como foi o caso do voceiro de En Marea, Luís Villares, o deputado Antón Sánchez e outros parlamentarios deste grupo. Tamén estiveron polo PSOE, o senador Ricardo García Mira ou a deputada Dolores Toja, entre outros. Ou o deputado do BNG, Xosé Lois Rivas “Mini”, o responsable de organización, Bieito Lobeira e o responsable comarcal, Serxio Domínguez por este partido.O Partido Popular estivo representado pola coordinadora comarcal e portavoz ceense Zaira Rodríguez e por portavoces da bisbarra.
O comité pide ós dirixentes locais do PP que “presionen” a Feijóo
Os membros do comité de empresa de Ferroatlántica teñen claro que a solución está nas mans do presidente da Xunta e así o ratificaron o venres pola noite durante o transcurso dun pleno celebrado no concello de Mazaricos.”Se Feijóo non autoriza, non hai venda” explicaron. E pediron aos dirixentes do Partido Popular na Costa da Morte que “presionen” ao seu líder para evitar “a ruína” da zona advertíndolles que “non vale estar detrás da pancarta e ser os verdugos da comarca”.
Fotos- En Marea – PSdeG