Case duascentas persoas acudiron a representación de “Eroski Paraíso” na Casa da Cultura da Picota o pasado sábado. A obra tiña tódolos alicientes para conectar co público. Unha compañía de relevancia como Chévere, un actor coñecido coma Miguel de Lira, e unha historia que lembraba os tempos da discoteca Paraíso en Muros, cun protagonista chamado Antonio Formoso(Miguel de Lira),veciño de Arcos, acompañado no reparto por Patricia de Lorenzo,Cristina Iglesias, Fidel Vázquez e Luís Martínez.
Bolsas coa imaxe MZ, e a colaboración doutras persoas do concello na preparación da obra engadían máis interese a velada.E a xente non fallou a cita nunha noite de choiva.Nin a obra decepcionou.Entre os asistentes estaba o alcalde de Mazaricos, Juan José Blanco Riveiro e varios concelleiros do grupo de goberno.
Houbo momentos cómicos que se combinaban con outros máis melancólicos,e diversas reflexións sobre o pasado e o presente dunha comarca e os seus problemas.Persoas que parten dun mesmo punto de partida, separan os seus camiños para volver a encontrarse nun inicio que é o mesmo lugar pero moi diferente. Porque as cousas cambian e evolucionan.Ou desaparecen.E “Eroski Paraíso” ten esa carga emocional.
E foi precisamente, Miguel de Lira, o que despois dos merecidos aplausos, despedía a función co sorteo entre o público da pescada que aparecía na obra e que Patricia de Lorenzo, no seu papel de traballadora dun supermercado, cortara e preparara, mentres resucitaba lembranzas diante dunha cámara.