//O BNG apoia ao Comité de empresa de Ferroatlántica e pide a comparecencia de dos conselleiros// Ana Pontón pide que se eviten os movementos especulativos// Compromiso por Galicia tamén apoia as demandas dos traballadores//
A portavoz nacional do BNG, Ana Pontón, anunciou en Cee que vai solicitar a comparecencia dos conselleiros de Industria e Medio Ambiente para que expliquen a posición da Xunta “para evitar movementos especulativos de compravenda das minicentrais e, non menos importante, impedir que haxa ningún tipo de segregación entre a actividade industrial de Ferroatlántica e a explotación eléctrica do Xallas”.
Ana Pontón e o deputado Xosé Luís Rivas “Mini” transmitiron o seu apoio ao Comité de empresa de Ferroatlántica.“Desde o BNG compartimos a preocupación dos e das traballadoras por tres razóns, porque pon en risco a viabilidade e futuro do emprego, porque desde o punto de vista legal a segregación das minicentrais da actividade industrial de Ferroatlántica non é posíbel, son unha unidade indivisible e, en terceiro lugar, porque implicaría unha burla que se especule con concesións públicas de recursos naturais que son de todos” asegurou Ana Pontón.
O BNG critica a actitude “morna” do goberno galego ante as informacións publicadas nos medios e advirten que neste asunto “non pode haber medias tintas”. Pontón Mondelo considera “incomprensible a posición tan morna que está a manter a Xunta ante as informacións que avanzan unha posible especulación con operacións de compravenda das concesións que, mesmo podería ser un paso previo á segregación de Ferroatlántica”.
Compromiso por Galicia tamén apoia as reivindicacións dos traballadores
O secretario xeral de Compromiso por Galicia, Xoán Bascuas, tamén expresou o seu apoio ós traballadores e pediu “que se escoite e se atenda ao Comité de empresa, porque non é lóxico o silencio da dirección do Grupo Villar Mir” e tamén demandou da Xunta que contacte cos representantes da empresa para coñecer os seus plans e fiscalice a posible venda.
“Unha vez máis, os recursos naturais galegos son pasto da avaricia e caen en mans alleas, sen dar garantías de ningún tipo” manifestou o líder de Compromiso por Galicia.
