O concello da Laracha prepara a tradicional Festa- Homenaxe ós maiores que se celebrará o 14 de maio.
Novas vías de colaboración
O alcalde de A Laracha, José Manuel López Varela mantivo un encontro co conselleiro de Política Social, José Manuel Rey Varela, ó que lle expuso varias demandas desde o concello como a posta en marcha dun novo centro social, pero onde tamén se destacaron cuestións como a relativa ó incremento de 70 horas no Servizo de Axuda no Fogar e outras melloras. Os dous dirixentes amosáronse partidarios de buscar novas vías de colaboración para mellorar a calidade de vida dos usuarios do centro de día e do fogar residencial, e destacaron o aumento de prazas na escola infantil. Na xuntanza tamén estivo presente a concelleira Patricia Bello.
Festa dos Maiores
Desde o concello da Laracha xa están ultimando a Festa Homenaxe ós maiores que se desenvolverá no pavillón do IES Agra de Leborís o vindeiro 14 de maio, e que se inclúe no programa do San Isidro e as Letras Galegas.
As entradas, cun custo de dez euros, xa están a venda nos centros sociais do concello. A actividade, que contará tamén cunha misa e cun baile con música en directo, está dirixida a veciños do concello, maiores de 65 anos de idade, xubilados e pensionistas.
Xunta de goberno
Por outra banda, na última xunta de goberno local acordouse formar parte do programa do Servizo de Voluntariado Xuvenil da Consellería de Política Social, e noutro programa para o equipamento e mellora de instalacións da Consellería de Cultura, así como noutro de equipamento de emerxencias de Presidencia.