O BNG da Costa da Morte considera que “Ferroatlántica non pode ter carta branca para facer o que lle dea a gana e desecar un río”, como foi o caso do Río Xallas, acción pola que un xulgado impuxo unha fianza de 8,5 millóns de euros ao grupo Villar Mir.
Neste senso, o portavoz nacionalista Serxio Domínguez lamentou a “sobreexplotación de maneira salvaxe” das augas do Xallas, apoiando as medidas solicitadas pola deputada Ana Pontón no Parlamento de Galicia. “Privouse a Costa da Morte de algo moi importante para o turismo como é a cascada do Ezaro” indicou Domínguez, que quixo valorar o traballo da asociación Ríos con Vida “para que se volvera a abrir”.
O PSdeG vendeu a pel do oso antes de cazalo
Con respecto a que desde o PSdeG se falara de quén sería o presidente da Deputación, Serxio Domínguez lamentou que “se deran pasos adiante sen ter en conta que non teñen unha maioría”.
“Non podes vender a pel do oso antes de cazalo- dixo o portavoz comarcal nacionalista-Primeiro hai que falar co BNG e coas outras forzas”.
Un decálogo de propostas para Cee
Nunha entrevista no programa “Na Encrucillada”, o tamén portavoz municipal do BNG explicou a súa iniciativa de presentar un decálogo de propostas “a custe cero” dirixidas ao goberno en minoría do independente Ramón Vigo.
“Se as levan a cabo sería unha mostra de que queren chegar a acordos co BNG, que fagan que Cee sexa gobernable” sinalou Domínguez, que ten claro que a súa formación ten “un programa de goberno e se podemos levar adiante medidas do noso programa de goberno non o deixaremos pasar”.
Avanzou ao goberno local que “se se acercan podemos encontrarnos no camiño e facer cousas xuntos”. Entre as medidas figuran o saneamento da ría, recuperar a Mostra de Teatro, a retirada do PXOM do proxecto do campo de golf, demandar a Xunta o arrando do centro médico, solucionar os problemas da piscina ou abrir ao público os xardíns de Fernando Blanco e cumprir coa lei no Castelo da Ameixenda “obrigando a súa apertura”.
Resultados históricos na Costa da Morte
Salvo o “baixón” sufrido en Cee, para Domínguez nas pasadas eleccións municipais déronse “uns resultados históricos e estamos tremendamente satisfeitos”, destacando as novas maiorías absolutas en Carnota e Vimianzo, o cogoberno de Fisterra, a “posibilidade de volver a entrar” no goberno de Corcubión, ou volver a estar presentes na corporación de Camariñas.