Mauro Aufiero Vigo confía no cambio político en Camariñas. Pensa hai que superar o clima de enfrontamento despois de máis de trinta anos de goberno socialista.
Xosé Manuel Lema
O candidato do Partido Popular de Camariñas traballa para que a “a xente nos valore como alternativa a un goberno socialista de trinta anos”, e observa “ganas dun cambio” que contempla como unha “opción viable”.
As imputación de Pichurri un “tema tabú no PSOE”
Mauro Aufiero asegura que a xente está preocupada polas imputacións que afectan ao alcalde, Manuel Valeriano Alonso de León, e aínda que terá que resolver a xustiza, ten a impresión de cómo “se estivera prohibido falar das imputacións do alcalde”.
“Eu estaría tentando demostrar a miña inocencia, pero aquí todo o contrario. Este é un tema tabú no PSOE” manifestou o líder do PP camariñán, ao tempo que se pregunta se a xente vai xogar a “ruleta rusa” de votar a un alcalde que podería ser condenado.
Unha candidatura “case totalmente renovada”
En declaracións ao programa “Na Encrucillada”, Mauro Aufiero confirmou que a lista do PP será “case totalmente nova” e informou o desexo dos actuais concelleiros populares de deixar a actividade política:”Os concelleiros que temos a día de hoxe van a abandonar a política activa na primeira liña, pero esperamos contar coa súa experiencia”.
Outro dos temas que comentou o candidato do PP na sintonía de Fórmula Fun e Radio Xallas foi a problemática das baterías de Cabo Vilán:”Estrañoume que o alcalde despois de mentirnos un par de veces, recorrera ao Plan Xeral. Tiña que dicir claramente que estaba en contra das baterías”
Disputadas fomentadas desde o concello
Aufiero Vigo agarda que o pobo aposte polo PP para facer “de Camariñas un concello mais atractivo” e pensa que “se poden facer mellor as cousas e dar un cambio grande a este concello”.
Unn dos aspectos que pretende mellorar é a convivencia e superar “o ambiente enrarecido” que hai porque “está asentada unha disputada entre PSOE e PP fomentada desde o concello, que lle ven de marabilla ese enfrontamento, pero todos somos veciños”.
O PP celebra o vindeiro sábado unha cea baile no Restaurante O ´Ariño de Xaviña, e segundo confirmou Aufiero xa conta “co aforo totalmente ocupado”.