O alcalde de Carballo, Evencio Ferrero, afronta os últimos meses de lexislatura coa ilusión de que os veciños “valoren a nosa capacidade de xestión” fronte ó “escaso por non dicir nulo traballo da oposición”.
Xosé Manuel Lema @xmlema
“Carballo medrou, vaise convertendo nun bo lugar para vivir e esa e a nosa reflexión serena” apuntábame Evencio Ferrero na conversa que mantíñamos no programa “Na Encrucillada” e que se pode escoitar neste mesmo artigo.
Un goberno que xestiona e unha oposición que non traballa
Defende con orgullo a súa xestión porque “Nos peores momentos da crise fomos capaces de abrir unha escola infantil, un centro de día e unha nova biblioteca”. As expectativas electorais do BNG son boas, e o rexedor está convencido de que “aínda que podemos equivocarnos e temos que recoñecer erros, a xente venos como un goberno honrado”.
En contraposición ao seu balanzo, fai mención ó traballo “escaso por non dicir nulo da oposición” que na capital de Bergantiños está conformada por Partido Popular, Terra Galega e PSOE.
Expresa as súas discrepancias coas críticas do PP, que suspende a súa xestión de doce anos por ineficaz. Pensa que o grupo que lidera Miguel Ferreiro “fai unha crítica que non se corresponde coa realidade e está descontextualizada”.
Escoita a entrevista de Evencio Ferrero (Desde o minuto 33 do audio)
Evencio fala da «escasísima acollida» dos movementos alternativos
“As do PP son visión catastrofistas, negativistas e ata nihilistas” afirma Ferrero. Sobre estes meses previos as eleccións comenta que “son os máis convulsos” pero confía no apoio da xente:
“Sempre aparecen novas persoas que fan ruído para gañar espazo mediático pero o traballo faise en catro anos non en catro meses”. Tampouco lle preocupan as alternativas pola esquerda ou as chamadas mareas cidadás que “En Carballo escasísima acollida”.
