Manoli Rodríguez aspirará a alcaldía de Coristanco, logo de ser elixida nas primarias abertas a cidadanía celebradas este sábado.
Compromiso por Galicia contará con dúas mulleres como cabezas de cartel nos concellos coruñeses de Coristanco e Carballo, despois das primarias abertas a cidadanía celebradas este sábado en Coristanco e nas que se elixiu a Manoli Rodríguez Pereiro como aspirante a alcaldía.
Despois de ser respaldada polo 100% dos votantes, e nunha intervención pública, Rodríguez Pereiro apostou por “unha política de proximidade, priorizando a transparencia no concello, o mantemento dos servizos sociais e a creación de emprego”. Nas primarias celebradas en Coristanco estiveron presentes Paulo Carlos López e Ángel Tallón, da executiva nacional de Compromiso por Galicia.
A semana anterior, e mediante o mesmo sistema de primarias, elixíuse a Esther Iglesias Barreiro como candidata no concello de Carballo, sendo a primeira muller na historia democrática da capital de Bergantiños que lidera unha candidatura. A vindeira semana terán lugar as primarias no concello de Vimianzo.
