O concello de Vimianzo conta desde este 29 de decembro cunha nova formación política. Un grupo de militantes constituiu a primeira agrupación de Compromiso por Galicia na bisbarra da Costa da Morte.
Cristóbal Mourín
A xuntanza estivo presidida polo secretario xeral do partido, Xoán Bascuas e polo secretario de organización, Manoel Vello, que deron a benvida a esta nova agrupación.
Logo tivo lugar a elección do secretario local, posto que recae en Javier Miñones Trillo. Estará acompañado na executiva de CxG por Ismael Cernadas Castro, Laura Figueiras Trillo, Faustino Castro Olveira, Julio Blanco Bras e Fátima Rama Varela. A agrupación decidiu celebrar “unhas eleccións primarias abertas a cidadanía” para elixir o seu candidato a alcaldía o vindeiro 17 de xaneiro.
Javier Miñones agradeceu o apoio do partido e dos militantes e amosouse “ilusionado por poder traballar para poder cambiar as cousas no concello de Vimianzo”.
Xoán Bascuas fala para Fórmula Fun e Adiante Galicia
O director de Adiante Galicia, e xefe de informativos de Fórmula Fun Galicia Xosé Manuel Lema recolleu en exclusiva as primeiras declaracións do secretario xeral de Compromiso por Galicia, Xoán Bascuas ao remate de xuntanza, e que foron emitidas nos informativos de Fórmula Fun que dirixe Adrián Varela.
Bascuas amosou a súa satisfacción porque esta é “a primeira agrupación en toda a Costa da Morte. A primeira pinga que se vai a propagar coma o aceite e que nos permitirá ter presenza en máis localidades da comarca”.O líder de Compromiso por Galicia definiu a Javier Miñones como “unha persoa implicada en Vimianzo e comprometida co noso país” coa que houbo “unha empatía e identificación coa proposta de Compromiso por Galicia”.
Xoán Bascuas insistiu na “proposta política novedosa” que ofrece CxG “cun procedemento innovador onde a cidadanía participa” como son as primarias. Sobre o papel de Compromiso nun concello tan aberto políticamente como Vimianzo outorgou a súa confianza nos novos dirixentes locais:” Non importa cómo o poda ver o alcalde ou a oposición nos imos estar coa veciñanza”.
Así se dou a exclusiva en Fórmula Fun (Gravación)
Frecuencias de Fórmula Fun- Xallas-Costa da Morte 107.5 FM- A Coruña 88.2 -Ferrolterra 90.3- Bergantiños 91.9FM
