Sería o comprendido entre a depuradora e a vía do tren, cuxa lonxitude pode chegar a ser duns 500 metros.
O alcalde de Neda, Ángel Alvariño Saavedra, trasladou ao xefe da Demarcación de Costas en Galicia, Rafael Eimil, a petición de prolongación do paseo marítimo coa execución dun novo tramo. Sería o comprendido entre a depuradora e a vía do tren, cuxa lonxitude pode chegar a ser duns 500 metros.
A actuación, segundo o alcalde, serviría para darlle “maior relevancia á fronte marítima do municipio”un espazo no que conviven desde actividades deportivas e profesionais, como a pesca, ata as relacionadas co paseo e o ocio”.
Alvariño tamén considera que Costas debería retomar o proxecto de conexión dos paseos marítimos que xa existen tanto en Neda como en Fene, á altura da zona do Ponto, “para así garantir a conservación dun novo tramo de costa e mesmo tamén para que se poida percorrer a pé a cara este do borde litoral da ría, algo que xa se pode facer desde Ferrol ata Neda a través da pasarela agora en proceso de reparación”.
Estas peticións realizáronse coincidindo coa visita que fixo Eimil, para inspeccionar as obras de mellora da pasarela peonil sobre a desembocadura do río Xuvia, e que marchan a bo ritmo. Tamén estivo presente a alcaldesa de Narón, Marián Ferreiro.
Os traballos contan cun orzamento de 196.000 euros, estarán rematados, previsiblemente no mes de marzo, e consisten na limpeza e reposición da estrutura de metal da ponte, a aplicación de tratamentos para conservar a madeira e a reconstrución da cuberta de zinc.
