Beatriz Mato felicitou ao alcalde Benito Portela polo documento elaborado. Desde o tripartito de Sada consideran que se trata dunha “boa nova” a aprobación.
O concello de Sada xa conta cun documento moi importante para o presente e o futuro deste concello, o Plan Xeral de Ordenación Municipal que acaba de ser aprobado de forma definitiva. Unha ferramenta que susbtituirá ás normas subsidiarias de 1997.
A conselleira de Medio Ambiente,Beatriz Mato, asinaba este venres a orde de aprobación definitiva no transcurso dunha xuntanza co alcalde Benito Portela, e na que tamén estaban presentes a directora xeral de urbanismo, Encarnación Rivas e o concelleiro de urbanismo, Fran Montouto. Beatriz Mato felicitou a Benito Portela polo seu traballo.
Segundo Medio Ambiente:” O plan xeral considera unha poboación obxectivo para Sada próxima aos 20.000 habitantes, no seu horizonte temporal de catro cuadrienios, incrementada a 25.000 habitantes nos meses do verán. Así, o PXOM prevé unha capacidade residencial de 3.420 novas vivendas, parte delas no contorno urbano, sendo que ademais das 18 actuacións para a consolidación da trama, o PXOM prevé tres ámbitos de solo vacante urbanizable residencial, nos lugares das Brañas, Agra de Samoedo e Camiño da Braña”. A Xunta investiu uns 185.000 euros para a elaboración deste documento.
Desde o goberno local de Sada, formado por Sadamaioría, BNG e PSdeG, consideran esta aprobación “unha boa nova” que vai “dotar de seguridade xurídica a todas aquelas inversións e actuacións que se queran implementar ao abeiro do mesmo por parte dos veciños e veciñas de Sada” e facilitará “ que o propio Concello poida acometer investimentos en equipamentos, dotacións e infraestruturas necesarias para atender as demandas da cidadanía”.
