A Dirección Xeral de Patrimonio decidiu incluír o Cine Zárate de Mugardos no Catálogo de Patrimonio Cultural de Galicia como ben inmoble, coa categoría de Monumento.
Testemuña da identidade mugardesa
Segundo explican desde o goberno galego:”Desde o punto de vista da relevancia cultura, o Cine Zárate representa unha testemuña da identidade mugardesa nun período de prosperidade económica e social asociada á industria conserveira e aos movementos migratorios. Así, o seu valor non reside exclusivamente na súa singularidade material, senón tamén na vinculación co contexto socio-económico da época, que posibilitou o desenvolvemento da cultura do lecer. Polo tanto, as particularidades técnicas do Cine Zárate deben valorarse xunto coa súa dimensión como elemento da identidade local e a súa repercusión na sociedade mugardesa e na súa cultura”.
Fundado en 1926 e pechado no 1969
O Cine Zárate (o nome fai alusión ao indiano Pedro Zárate) inaugurouse en maio de 1926 cunha sala cunha sala cinematográfica deseñada cun estilo eclético, polo arquitecto coruñés Eduardo Rodríguez-Losada Rebellón.
Está situado,en estado ruinoso, a poucos metros da casa consistorial de Mugardos. A súa decadencia comezou a partir do seu peche no ano 1969.
No informe elaborado pola propia Consellería de Cultura indícase que “o edificio presenta un avanzado estado de deterioración a causa da falta de uso e da ausencia de conservación. Sen cuberta, soamente conserva en pé as fachadas, das cales presentan un interese especial a principal do cinema e a lateral suroeste, na cal se acaroa a estrutura porticada da cantina”.Agora, logo desta declaración, agárdanse medidas para a súa conservación.