Tres accidentes de tráfico rexistrados durante a madrugada do sábado ao domingo deixaron un balance de nove persoas feridas nos concellos de Coristanco, Santa Comba e Ponteceso, segundo informou o 112 Galicia.
O primeiro dos sinistros produciuse en Coristanco. O sistema automático de emerxencia E-Call alertou ao 112 Galicia ás catro e corenta e cinco da madrugada dun accidente na AG-55, á altura do quilómetro 37,5, na parroquia de Oca. Tras contactar co ocupante do vehículo, este confirmou que sufrira un accidente e que permanecía atrapado no interior do turismo. Os Bombeiros de Carballo tiveron que excarceralo e, unha vez liberado, foi evacuado polos profesionais do Servizo de Urxencias Sanitarias de Galicia-061.
As Caselas
Antes, arredor das dúas e media da madrugada, rexistrouse outro accidente en Santa Comba, na zona das Caselas. Un turismo saíuse da vía e bateu contra un muro. Os seus catro ocupantes, dous adultos e dous menores de idade, conseguiron abandonar o vehículo polos seus propios medios antes da chegada dos servizos de emerxencia. Todos foron trasladados ao Centro de Saúde de Santa Comba e, segundo o 112 Galicia, ningún presentaba feridas de gravidade.
Cruce da Campara
O terceiro accidente produciuse arredor das seis e media da mañá na estrada DP-6805, ao paso por Cores, en Ponteceso. Segundo o 112 Galicia, un vehículo saíuse da vía e os seus catro ocupantes resultaron feridos de consideración. Cando chegaron os equipos de emerxencia, todas as persoas estaban accesibles e liberadas, aínda que precisaron asistencia sanitaria.
O turismo acabou impactando contra unha vivenda no coñecido cruce da Campara, onde conflúen as estradas DP-6805 (Pazos-A Campara) e DP-4307(Ponteceso-Malpica), un punto no que xa se teñen rexistrado outros accidentes. Os catro ocupantes son mozos e, e dous deles sufriron feridas de carácter grave. O vehículo implicado era un BMW M4 con matrícula andorrana.
Nos tres accidentes mobilizáronse efectivos do Servizo de Urxencias Sanitarias de Galicia-061, bombeiros, Garda Civil de Tráfico, Protección Civil e outros servizos de emerxencias coordinados polo 112 Galicia.
FOTOS- TVG- Ponteceso
