As autoescolas da provincia da Coruña denuncian que a falta de examinadores da Dirección Xeral de Tráfico está a provocar listas de espera de entre seis meses e un ano para iniciar as prácticas de circulación e acceder ao exame práctico do permiso de conducir.
A situación afecta con especial intensidade á área de Santiago de Compostela, onde este verán o cadro de examinadores quedará reducido practicamente a un efectivo a tempo completo, tal e como explicaba á TVG vicepresidente da Asociación Provincial de Autoescolas da Coruña.
Segundo a Asociación Provincial de Autoescolas da Coruña, o problema prexudica especialmente ás persoas que precisan o carné para incorporarse ao mercado laboral, como futuros condutores profesionais ou aspirantes a oposicións.
O sector asegura que leva anos reclamando solucións á DXT a través da Confederación Nacional de Autoescolas, pero afirma que non houbo avances. As academias consideran que o principal problema non é a falta de profesorado, senón a insuficiencia de examinadores, e advirten de que a situación seguirá prexudicando tanto ao alumnado como ás propias empresas.
