Despois de acumular reservas nos Pinchos Irmandiños e quentar o ambiente con diferentes actividades, o Asalto ao Castelo afronta a súa fin de semana de efervescencia.
O Asalto ao Castelo de Vimianzo celebrará esta fin de semana unha nova edición cun amplo programa de actividades que combinará recreación histórica, música, artesanía, animación de rúa e propostas para todas as idades.
A programación comezará o venres 3 de xullo co XIII Espazo Artístico Itinerante e as actuacións da A.C. Trubisquiña e do Circuíto Musical con Dautaka. Pola noite terá lugar a tradicional Cea Medieval no foso do castelo, amenizada polo Pallaso Blanco e Cé Orquestra Pantasma, coa queimada dirixida polo druída Miguel Queiro. A xornada rematará coa XIV Noite Meiga, no campo da festa do Asalto, con concertos de Ulex, Che Sudaka, Quinkillada e La Yaya Dj.
Sábado o “Día D” dos Irmandiños
O sábado 4 de xullo, considerado o día grande da festa, arrancará coa XIV Feira Artesanal, aberta durante toda a xornada na Praza do Concello, e coa Mostra de Artesanía ao Vivo no castelo.
Durante a mañá desenvolveranse obradoiros infantís, actividades de xogos de mesa e xadrez, actuacións do Bruxo Medieval Iván Tourís, o Espazo Artístico Itinerante e o III Espazo Neghra Sombra, con concertos de Coídos, O Rabelo e Nenaza e Tapa d’Orella.
Xa pola tarde celebraranse o XIII Asaltiño, destinado ao público infantil, a Viaxe no Tempo coa historia dramatizada do castelo, torneos, entrega de premios do Certame de Microrrelatos Irmandiños e actuacións musicais. Ás sete da tarde terá lugar a reunión das Irmandades Parroquiais da Terra de Soneira e, posteriormente, o pregón da festa e o izado da bandeira irmandiña.
A partir das oito e media da tarde o Campo da Festa acollerá os concertos de De Ninghures e En Tol Sarmiento, antes do momento central da celebración, o Asalto ao Castelo, previsto para as 23.30 horas. A festa continuará de madrugada coas actuacións de Dakidarría, Los de Marras e Festicultores.
Domingo 5 de xullo en Vimianzo
A programación concluirá o domingo 5 de xullo con visitas guiadas e teatralizadas ao castelo, unha sesión vermú a cargo de Medio Quinhón na Praza Castelao e unha nova cita do Festival Atlántica, que ofrecerá unha sesión de narración oral con José Luis Gutiérrez «Guti» no Castro das Barreiras.
O programa combina tradición, patrimonio, cultura popular e música en directo, consolidando o Asalto ao Castelo como unha das principais festas de recreación histórica de Galicia.
