A Real Academia Nacional de Medicina elixiu ao profesor xalleiro Ángel Carracedo como novo académico de número da institución. Carracedo ocupará o sillón número 19 e participará nos traballos científicos, publicacións e actividades de asesoramento que desenvolve a Academia.
Catedrático de Medicina Legal da Universidade de Santiago de Compostela desde 1990, Carracedo dirixe actualmente a Fundación Pública Galega de Medicina Xenómica e varios grupos de investigación vinculados á xenética e á medicina molecular.
O investigador de Santa Comba é unha das referencias internacionais no ámbito da xenética forense e contribuíu á implantación das probas de ADN utilizadas pola xustiza en numerosos países. Ao longo da súa traxectoria publicou máis de 900 artigos científicos, dirixiu 110 teses doutorais e impartiu miles de conferencias e actividades divulgativas en todo o mundo.
A toma de posesión como académico celebrarase nos próximos meses tras a votación realizada polos membros da institución.