A Xunta de Galicia vén de autorizar a licitación das obras de renovación do firme en oito estradas autonómicas ao seu paso por dez concellos das comarcas de Soneira, Xallas, Fisterra o Barcala, cun investimento previsto de preto de 3,5 millóns de euros.
Segundo informou o Goberno galego, as actuacións desenvolveranse en distintos treitos da vía de altas prestacións VG-1.4, entre Cee e Sardiñeiro, así como nas estradas AC-404 (Santa Comba-Baio), AC-429 (Ponteceso-Laxe), AC-440 (Berdoias-Muxía), AC-444 (Negreira-Ponte Failde), AC-546 (Negreira-A Pereira), AC-550 (Cee-Ribeira) e AC-552 (A Coruña-Cee).
As intervencións afectarán aos municipios da Baña, Cabana de Bergantiños, Cee, Fisterra, Laxe, Muros, Muxía, Santa Comba, Vimianzo e Zas, cunha actuación global que se estenderá ao longo de preto de 65 quilómetros.
Execución neste 2026
O obxectivo destes traballos é mellorar as condicións funcionais das vías autonómicas e reforzar a seguridade viaria. As obras consistirán na rehabilitación superficial do firme, mediante actuacións orientadas a recuperar as prestacións do pavimento e a garantir a súa durabilidade.
A Consellería de Vivenda e Planificación de Infraestruturas prevé licitar as actuacións nas vindeiras semanas a través da Axencia Galega de Infraestruturas, co propósito de adxudicalas no segundo trimestre do ano e executalas ao longo deste 2026, cun prazo estimado de seis meses.
Desde a Xunta subliñan que estas intervencións non requirirán expropiacións, ao desenvolverse dentro da franxa de dominio público das estradas autonómicas.
O Executivo galego destaca que esta actuación enmárcase na súa aposta pola conservación e mellora da rede viaria existente, o que permite reducir custos de mantemento a longo prazo e incrementar a seguridade nas estradas. Neste sentido, lembra que en 2026 se acada un investimento histórico en conservación da rede autonómica, con 71,6 millóns de euros destinados a este fin
