O Parlamento de Galicia entregou a Medalla do Parlamento 2026 a nove deputadas galegas que participaron hai trinta anos na IV Conferencia Mundial da Muller de Beijing, nun acto no que tamén se recoñeceu o labor desenvolvido por Manuela López Besteiro na promoción da igualdade.
As distinguidas son María Xosé Ares Casal, María Teresa Fernández Piñeiro, Pilar Pedrosa González de Castejón, María Fernanda Cerviño Villaverde e Elisa Madarro González, do Grupo Popular; María Xosé Porteiro García e María Antonia Álvarez Yáñez, do Grupo Socialista; e María Pilar García Negro e Olaia Fernández Davila, do Bloque Nacionalista Galego. A medalla de Elisa Madarro e Pilar Pedrosa, a título póstumo, foi recollido polas súas fillas.
O presidente do Parlamento, Miguel Ángel Santalices, destacou o “compromiso e a dignidade” das premiadas e subliñou que a súa participación en Beijing marcou un fito que forma parte da historia de Galicia e do avance nas políticas de igualdade.
Tamén puxo en valor o traballo de Manuela López Besteiro, quen impulsou a creación dun departamento específico de igualdade no Goberno galego, desde o que se promoveron accións de apoio ao emprendemento feminino, ao asociacionismo, especialmente no rural, e á loita contra a violencia de xénero.
Santalices lembrou que en 1995 o Parlamento galego ratificou por unanimidade a Declaración de Beijing, converténdose Galicia nunha das primeiras comunidades en incorporar esa axenda, e salientou a evolución da representación feminina, que pasou do 16 por cento daquela a ser maioría na Cámara na actualidade.
O acto celebrouse no marco do 45 aniversario do Estatuto de Autonomía de Galicia, do que destacou a súa contribución á estabilidade e ao progreso da comunidade.
Unha das mulleres recoñecidas foi a xalleira María José Ares Casal que recentemente falou deste recoñecemento en Radio Xallas.
