María Xosé Ares Casal será unha das mulleres que recibirá a Medalla do Parlamento de Galicia 2026. Ares Casal foi deputada autonómica, concelleira en Santa Comba durante 22 anos, delegada de Educación da Xunta e directora do CEIP Barrié de la Maza, entre outros cargos que conforman unha dilatada traxectoria vinculada ao municipio xalleiro.
A Mesa do Parlamento acordou por unanimidade conceder a Medalla do Parlamento de Galicia 2026 ás nove deputadas da IV Lexislatura que hai trinta anos participaron na Conferencia Mundial da Muller en Pequín, así como á exconselleira e deputada Manuela López Besteiro.
As deputadas distinguidas son María Xosé Ares Casal, María Teresa Fernández Piñeiro, Pilar Pedrosa González de Castejón, María Fernanda Cerviño Villaverde, Elisa Madarro González (Grupo Popular); María Xosé Porteiro García, María Antonia Álvarez Yáñez (Grupo Socialista); e María Pilar García Negro e Olaia Fernández Dávila (Grupo do BNG), a maioría integrantes da primeira Comisión Parlamentaria para a Igualdade e os Dereitos das Mulleres.
O acto celebrarase o 6 de abril, coincidindo co aniversario da promulgación do Estatuto de Autonomía de Galicia, e recoñece a labor pioneira destas deputadas e o seu compromiso coas políticas de igualdade.
Desde a súa primeira edición, a Medalla do Parlamento de Galicia entregouse anualmente nesta data, recoñecendo en anos anteriores a expresidentes e expresidentas do Parlamento, a Comisión dos Dezaseis, Cáritas Diocesana, COGAMI, Aldeas Infantís SOS, a emigración galega, fundacións da Xeración Nós, institucións estatutarias, a cooperación transfronteiriza con Portugal e, recentemente, a Real Academia Galega de Belas Artes, Afundación-Obra Social ABANCA e o catedrático Ramón Villares.
FOTO María José Ares Casal- Xosé Manuel Lema- Arquivo
