O pleno da Deputación da Coruña aprobou a primeira fase do Plan de Conservación de Vías Provinciais 2026, cun orzamento de 12,24 millóns de euros, un 7,5 % superior ao do pasado ano, destinado a actuacións de mantemento, reparación de firmes e mellora da seguridade viaria na rede provincial, que supera os 2.000 quilómetros.
O plan inclúe renovación de pavimentos, sinalización e obras de drenaxe, e complétase cos programas de reparacións urxentes e roza e limpeza das marxes, que elevan o investimento medio ata máis de 8.192 euros por quilómetro.
Segundo explicou o presidente provincial, Valentín González Formoso, o mantemento desta rede constitúe unha actuación prioritaria pola súa importancia para a mobilidade diaria e a actividade económica da provincia. A maior parte dos fondos destinaranse á renovación de firmes e capas de rodaxe e á mellora da sinalización, mentres que arredor do 17 % investirase en limpeza de cunetas, drenaxes e instalación de defensas viarias.
As actuacións distribúense en 36 grupos por toda a provincia. Entre os investimentos previstos figuran 260.072 euros na estrada DP-1914 Carballo-Portomouro (grupo 34); 341.777 euros para actuacións en Coristanco, Santa Comba e Zas (grupo 35); e 236.342 euros na DP-3404 entre Serra de Outes e Dumbría (grupo 36).
Ademais, destínanse 450.152 euros a vías de Carballo, Cerceda e A Laracha (grupo 17); 381.411 euros a Cabana, Malpica e Ponteceso (grupo 18); 145.376 euros a Camariñas, Laxe, Muxía e Vimianzo (grupo 19); 203.999 euros a Cee, Corcubión, Dumbría e Mazaricos (grupo 20); 386.092 euros a Ames, A Baña, Negreira e Val do Dubra (grupo 21); 415.235 euros a Ordes, Santiago, Tordoia, Trazo e Val do Dubra (grupo 22); e 428.100 euros a actuacións en Mazaricos, Muros e Outes (grupo 23).
A proposta saíu adiante cos votos favorables de PSOE, BNG e Alternativa dos Veciños e coa abstención do PP.
