A Deputación da Coruña e o Concello de Vimianzo renovaron o convenio de colaboración para garantir durante o ano 2026 a xestión cultural e turística do Castelo de Vimianzo e do conxunto etnográfico dos Batáns de Mosquetín. O acordo foi asinado este domingo polo presidente provincial, Valentín González Formoso, e pola alcaldesa de Vimianzo e deputada provincial, Mónica Rodríguez.
O convenio establece unha achega máxima da Deputación de 120.000 euros, máis do 85 % do financiamento dos gastos non cubertos polos ingresos da actividade. O orzamento total do proxecto ascende a 140.000 euros, destinándose a maior parte á programación e funcionamento do Castelo de Vimianzo.
O acordo dá continuidade ao modelo de xestión baseado na atención profesional ás persoas visitantes e nunha programación cultural e divulgativa ao longo de todo o ano. O castelo conta cunha exposición permanente, con centro de interpretación, paneis sobre a historia da fortaleza e diferentes manifestacións artesanais, ademais do acceso ao foso e ás dependencias do edificio medieval.
Entre os principais eixos da actividade figura a Mostra de Artesanía en Vivo, na que se amosan oficios tradicionais como o encaixe de Vimianzo, o traballo do liño, a olería de Buño, a maquetería naval e traballos en prata, vidro, coiro, papel ou palla. O programa inclúe tamén exposicións temporais, tanto de artesáns como doutras temáticas vinculadas á promoción cultural e patrimonial da Costa da Morte e da provincia.
A programación complétase con visitas guiadas e teatralizadas, especialmente no verán e en Semana Santa, así como visitas nocturnas con personaxes históricos. Ao longo do ano organízanse tamén actividades socioculturais como obradoiros, encontros de palilleiras, roteiros pola contorna, actuacións musicais, relatorios e propostas participativas para diferentes públicos. No verán inclúense as “Noites no Castelo”, con espectáculos culturais en pequeno formato.
O convenio incorpora ademais unha liña educativa, coa elaboración de unidades didácticas adaptadas aos distintos ciclos escolares, co obxectivo de converter o castelo nun recurso pedagóxico para os centros da comarca e da provincia.
O acordo terá vixencia desde o 1 de xaneiro de 2026 ata o 31 de marzo de 2027, garantindo a apertura, o mantemento e a programación continuada destes espazos patrimoniais.
