O evento «Saudade» da Deputación da Coruña comezou cunha cea inaugural celebrada no restaurante O Retiro da Costiña de Santa Comba. Este encontro reúne a un grupo de 13 chefs de recoñecido prestixio no ámbito nacional, que suman máis de 20 estrelas Michelin.
Entre os participantes destacados nesta xornada de arranque atópanse Alberto Chicote, Diego Guerrero, Paco Morales, Aitor Arregi, Maca de Castro, Begoña Rodrigo, Andoni Luis Aduriz, Toño Pérez, así como os chefs galegos Javi Olleros, Xosé Cannas, Manuel Costiña, Lucía Freitas e Pepe Solla.
Precisamente o xalleiro Manuel Costiña foi o anfitrión desta primeira xornada.
O vicepresidente da Deputación, Xosé Regueira, foi o encargado de dar a benvida a todos os asistentes, convidándoos a «degustar e gozar da nosa identidade; dos produtos, da gastronomía, da cultura e da xente deste territorio que é sinónimo de autenticidade, calidade e sustentabilidade».
Tras esta primeira xornada en Santa Comba, «Saudade» continúa os días 14 e 15 de xullo. As actividades desenvolveranse en diferentes localidades da provincia, incluíndo A Pobra do Caramiñal, Ribeira, Santiago de Compostela e Coristanco, con xornadas dedicadas á exploración dos produtos do mar e da terra galegos.
