A deputada autonómica do Partido Popular, Paula Mouzo Mas, tamén portavoz da formación no Concello de Camariñas, participou nunha entrevista en Radio Xallas onde abordou tanto a súa actividade no Parlamento galego como o seu papel na oposición municipal. Mouzo ofreceu unha visión crítica da situación política e institucional do seu concello natal.
“Hai unha cousa común: traballar polo interese xeral da sociedade”, sinalou sobre o seu labor institucional. Segundo explicou, a súa actividade parlamentaria ocupa boa parte do tempo, pero permite ver avances e formar parte “dun grupo comprometido”. Asemade, indicou que esa perspectiva permítelle contrastar coa realidade municipal: “En Camariñas, son a portavoz do principal grupo de oposición e vexo as dúas caras da moeda”.
Mouzo destacou a continuidade do PSOE á fronte do Concello de Camariñas, que leva gobernando máis de 40 anos de forma ininterrompida, con Sandra Insua como alcaldesa durante os últimos anos. Subliñou que “Camariñas é o concello que paga máis impostos de todas estas comarcas da volta, que está a piques de perder dous concelleiros pola perda de poboación e que ten unha das maiores débedas de toda a provincia da Coruña”.
A popular denunciou tamén a falta de xestión orzamentaria: “É un concello onde non se aproban orzamentos todos os anos, onde temos os caixóns cheos de facturas suspendidas pola Intervención e onde as parroquias están abandonadas, e a limpeza e as obras brillan pola súa ausencia”.
Entrevista a Paula Mouzo en Radio Xallas- Desde o minuto 60
Alternativa para un cambio político en Camariñas
Nun ton reivindicativo, Paula Mouzo recoñeceu a dificultade de exercer a oposición nestas circunstancias: “Entenderás que con estes datos tan negativos a labor de oposición non é fácil”. Con todo, puxo en valor o traballo realizado polo Partido Popular local: “Estamos presentando unha alternativa seria e solvente desde o Partido Popular. O noso traballo ten un feedback moi potente”.
Segundo apuntou, perciben cada vez máis apoio por parte da veciñanza: “Estou notando como os veciños se achegan a nós para que traslademos peticións. Hai xente que nos ofrece apoio e ánimo”. Para Mouzo Mas, ese respaldo cidadán é “o máis motivador de todo, sentir que estamos despertando a ilusión polo cambio político en Camariñas”.
Mostrándose convencida de que a súa alternativa gaña terreo, afirmou que “cada día está máis cerca e se seguimos nesta liña será realidade en dous anos”. E concluíu cunha metáfora contundente: “Despois de máis de corenta anos de involución e sectarismo, é o momento de deixar de seguir camiñando como o cangrexo e poñerlle o turbo a esta nosa Camariñas que tanta potencia ten. Somos un gran barco que leva décadas sen ninguén ó timón”.
Por último, criticou a falta de iniciativa do goberno local: “Non teñen iniciativa. Non hai proxectos ambiciosos e as poucas cousas que fan é porque llas pide o Partido Popular e collen algo de vergonza”. E rematou con outra declaración rotunda: “Temos catro soldos en Camariñas. Eu sempre digo que se o concello fora unha empresa, a nosa alcaldesa Sandra Insua estaría despedida”.
