O Partido Popular de Galicia anunciou que levará aos concellos e deputacións galegas unha moción en defensa do Estado democrático e de dereito, así como de repulsa á corrupción, sinalando a súa preocupación polos feitos que, segundo indican, afectan ao Goberno central.
A secretaria xeral do PPdeG, Paula Prado, realizou o anuncio en Monforte de Lemos, localidade que cualificou como “zona cero da corrupción do PSOE en Galicia”, en referencia ao informe da UCO sobre a trama de Koldo e un presunto amaño na adxudicación dunha obra ferroviaria.
Segundo Prado, a contratación dun tramo da liña Lugo-Monforte, por valor de 1,5 millóns de euros, estaría relacionada con xestións do asesor de José Luis Ábalos, sendo ministro Óscar Puente e presidindo Adif a lucense Isabel Pardo de Vera. A dirixente popular criticou a falta de reacción do PSOE e do BNG, e reclamou responsabilidades políticas.
Estivemos en Monforte de Lemos, a ZONA CERO da CORRUPCIÓN do PSOE. 🚆🏗 pic.twitter.com/9Pz2oh9NK9
— 🍒 Paula Prado (@paulapra2) June 19, 2025
Na rolda de prensa tamén participou Elena Candia, presidenta provincial do PP de Lugo, quen denunciou unha redución do investimento estatal en infraestruturas en Lugo nos últimos anos e pediu “contundencia e exemplaridade” ante os feitos.
A portavoz local do PP en Monforte, Katy Varela, agradeceu o apoio do partido e da Xunta de Galicia á cidade, e solicitou unha maior colaboración institucional por parte do Goberno local.
