A Consellería do Mar, a través de Portos de Galicia, está a executar obras de renovación de pavimentos nos portos de Camariñas e Camelle, no concello de Camariñas. A actuación conta cun investimento de 130.000 euros e permitirá mellorar as condicións das explanadas e viarios destas instalacións portuarias, que presentaban un desgaste notable.
Os traballos inclúen a reposición dos firmes deteriorados e o pintado da sinalización horizontal, así como o axuste de tapas de pozos, arquetas e sumidoiros para garantir unha superficie continua e segura.
Esta intervención enmárcase nun plan máis amplo promovido por Portos de Galicia que abarca 26 dársenas autonómicas, cun orzamento global de 1,6 millóns de euros. O plan contempla a substitución e reforzo de pavimentos, así como labores de saneo e mellora das explanadas.
No caso concreto do porto de Camariñas, as obras céntranse no vial de acceso, na explanada do peirao e na contorna do club náutico. En Camelle, os traballos afectan ao paseo marítimo, tanto na zona anterior como posterior á explanada portuaria.
Portos de Galicia sinala que estas melloras buscan incrementar a seguridade viaria tanto para os vehículos como para os peóns que transitan por estas zonas.
