A cuestión de «emerxencia lingüística» segue sendo un tema de debate. A plataforma Queremos Galego considera que a situación do galego si é crítica e convocou para o sábado 17 de maio, Día das Letras Galegas, unha manifestación baixo o lema «Lingua vital xa!».
O portavoz da plataforma, Marcos Maceira, afirmou que a manifestación debe ser «histórica» para reverter a situación que eles consideran de emerxencia e promover un cambio de rumbo na protección e impulso da lingua galega.
A mobilización terá lugar na rúa e agárdase que sexa unha «gran foliada pola lingua», onde se reclamará a necesidade de eliminar programas que, segundo a plataforma, buscan a destrución do galego. Maceira invitou á sociedade galega a saír á rúa e unirse á loita pola preservación e fortalecemento do galego.
A marcha sairá ás 12h da Alameda, pasará diante do IES Rosalía de Castro e do IES San Clemente, polo Franco e a rúa Fonseca, ata concluír na praza do Obradoiro, onde a actriz Isabel Risco conducirá un acto no que intervirán a coordinadora e o voceiro de Queremos Galego e se presentarán as entidades que participarán no proceso social Lingua vital para concretar e executar os acordos xa tomados en relación ao idioma.
